ദുബായ്: യുഎസ് ഇടക്കാല തിരഞ്ഞെടുപ്പിന് തൊട്ടുമുമ്പ്, ഹോർമുസ് കടലിടുക്കിലെ ചില ഇറാനിയൻ ലക്ഷ്യങ്ങള്‍ക്ക് നേരെ അമേരിക്ക പ്രതിരോധ ആക്രമണങ്ങള്‍ നടത്തിയതായി ഒരു യുഎസ് ഉദ്യോഗസ്ഥൻ സ്ഥിരീകരിച്ചു.
പേർഷ്യൻ ഉള്‍ക്കടലിലെ ഇറാന്റെ ഖെഷ്ം ദ്വീപില്‍ നിരവധി സ്ഫോടന ശബ്ദങ്ങള്‍ കേട്ടതായും, ഈ പ്രദേശത്തിന് മുകളിലൂടെ രണ്ട് യുദ്ധവിമാനങ്ങള്‍ പറക്കുന്നത് കണ്ടതായും ഇറാൻ സ്റ്റേറ്റ് മീഡിയ റിപ്പോർട്ട് ചെയ്തു. ഹോർമുസ് കടലിടുക്കിന് സമീപം മൂന്ന് യുഎസ് ഡ്രോണുകള്‍ വെടിവച്ചിട്ടതായി ഇറാന്റെ ഇസ്ലാമിക് റെവല്യൂഷനറി ഗാർഡ് കോർപ്സ് (ഐ‌ആർജിസി) അവകാശപ്പെട്ടതിന് തൊട്ടുപിന്നാലെയാണ് ഈ സംഭവം.
ഖെഷ്ം ദ്വീപില്‍ അടുത്തടുത്ത് അഞ്ച് സ്ഫോടനങ്ങള്‍ നടന്നതായി ഇറാന്റെ ഔദ്യോഗിക വാർത്താ ഏജൻസിയായ ‘ഇർന’ റിപ്പോർട്ട് ചെയ്തു. സ്ഫോടനങ്ങളുടെ ആഘാതം ദ്വീപില്‍ നേരിട്ട് പതിച്ചതിന്റെ സാധ്യതയിലേക്ക് വിരല്‍ ചൂണ്ടുന്നുണ്ടെങ്കിലും, പ്രാദേശിക അധികാരികള്‍ ഇതുവരെ ഔദ്യോഗിക പ്രസ്താവനയൊന്നും പുറപ്പെടുവിച്ചിട്ടില്ല. ചില പ്രദേശവാസികള്‍ രണ്ട് വിമാനങ്ങള്‍ മുകളിലൂടെ പറക്കുന്നത് കണ്ടതായി റിപ്പോർട്ട് ചെയ്തിട്ടുണ്ട്.
മറ്റൊരു സംഭവത്തില്‍, ഹോർമുസ് കടലിടുക്കിന് കിഴക്ക് ഭാഗത്ത് വച്ച്‌ തങ്ങളുടെ സൈന്യം ഒരു യുഎസ് എം‌ക്യു-9 ഡ്രോണ്‍ തകർത്തതായി ഐ‌ആർജിസി അറിയിച്ചു. ഇറാനിയൻ സൈന്യം തകർക്കുന്ന ഇത്തരത്തിലുള്ള 55-മത്തെ ഡ്രോണാണിതെന്ന് അവർ വിശേഷിപ്പിച്ചു.
തസ്‌നീം വാർത്താ ഏജൻസി പുറത്തുവിട്ട മറ്റൊരു പ്രസ്താവനയില്‍, ഖെഷ്ം ദ്വീപിന് തെക്ക് ഭാഗത്ത് വച്ച്‌ രണ്ട് യുഎസ് എം‌ക്യു‌എം-170 രഹസ്യാന്വേഷണ ഡ്രോണുകള്‍ വെടിവച്ചിട്ടതായി ഐ‌ആർജിസി അവകാശപ്പെട്ടു. ഇവ പിടിച്ചെടുത്തതായും, ഇതോടെ ഇറാനിയൻ സൈന്യം പിടിച്ചെടുത്ത ഇത്തരത്തിലുള്ള യുഎസ് ഡ്രോണുകളുടെ ആകെ എണ്ണം നാലായതായും അവർ പറഞ്ഞു. ഡ്രോണുകള്‍ നഷ്ടപ്പെട്ടതായി റിപ്പോർട്ട് ചെയ്തതിനെക്കുറിച്ച്‌ യുഎസ് സൈന്യത്തിന്റെ ഭാഗത്തുനിന്ന് ഉടനടി സ്ഥിരീകരണമൊന്നും ഉണ്ടായിട്ടില്ല.
അതേസമയം, നിലവിലുള്ള നയതന്ത്ര ശ്രമങ്ങള്‍ക്കിടയില്‍ ഇറാനുമായി ഒരു കരാറിലെത്താൻ സാധ്യമായേക്കുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് വീണ്ടും സൂചിപ്പിച്ചു. ഇറാമായി ഒരു യുദ്ധമുണ്ടാകില്ലെന്ന് ജനങ്ങള്‍ വിശ്വസിക്കുന്നതുകൊണ്ടാണ് ക്രൂഡ് ഓയില്‍ വില ഗണ്യമായി കുറയുന്നതെന്ന് അദ്ദേഹം ട്രൂത്ത് സോഷ്യലില്‍ കുറിച്ചു.
