ന്യൂഡൽഹി: സിജെപി പ്രതിഷേധത്തിന്റെ പശ്ചാത്തലത്തിൽ ഡൽഹി നഗരത്തിൽ കർശന നിയന്ത്രണം ഏർപ്പെടുത്തിയതിലുള്ള കോടതിയലക്ഷ്യ ഹർജി സുപ്രീംകോടതി ഇന്ന് പരിഗണിക്കും. ഞായറാഴ്ചയായതിനാൽ പ്രത്യേക സിറ്റിങ് നടത്തിയാണ് ഹർജികൾ പരിഗണിക്കുക. ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി മോഹന എന്നിവരാണ് ഹർജികൾ പരിഗണിക്കുക.
ശൈലേന്ദ്ര മണി ത്രിപാഠി എന്ന അഭിഭാഷകൻ നൽകിയ ഹർജിയാണ് കോടതി പരിഗണിക്കുന്നത്. കോടതിയുടെ നിർദ്ദേശങ്ങൾ മറികടന്ന് നിയന്ത്രണങ്ങൾ ഏർപ്പെടുത്തി എന്ന് ചൂണ്ടിക്കാട്ടിയാണ് അഭിഭാഷകൻ സുപ്രീംകോടതിയെ സമീപിച്ചത്.
45 മെട്രോ സ്റ്റേഷനുകളിലെ പ്രവേശനം ഡിഎംആർസി തടഞ്ഞുവെന്നും ട്രെയിൻ റദ്ദാക്കുന്നത് തുടർന്നുവെന്നും അഭിഭാഷകൻ ആരോപിച്ചു. കേന്ദ്ര ആഭ്യന്തര സെക്രട്ടറിക്കും ഡൽഹി പൊലീസ് കമ്മീഷണർക്കും എതിരെ കോടതിയലക്ഷ്യ നടപടി സ്വീകരിക്കണമെന്നും അഭിഭാഷകൻ ആവശ്യപ്പെടുന്നുണ്ട്.
പ്രതിപക്ഷ നേതാക്കളെ ഡൽഹി പൊലീസ് തടങ്കലിൽ വച്ചത് ചോദ്യം ചെയ്തുള്ള ഹർജികളും പരിഗണിക്കും.തൃണമൂൽ കോൺഗ്രസ് എംപിയും സീനിയർ അഭിഭാഷകയുമായ മേനക ഗുരുസ്വാമിയാണ് നേതാക്കളെ കരുതൽ തടങ്കലിലെടുത്തതിനെതിരെ സുപ്രീം കോടതിയെ സമീപിച്ചിരിക്കുന്നത്. ഇത്തരം നടപടികൾ സമാധാനപരമായി പ്രതിഷേധിക്കാനുള്ള ഭരണഘടനാ അവകാശങ്ങളുടെ ലംഘനമാണെന്ന് ഹർജിയിൽ ചൂണ്ടിക്കാണിക്കുന്നു. തെരുവിൽ നിന്ന് പ്രതിഷേധക്കാരെ കസ്റ്റഡിയിലെടുത്ത രീതിയെയും നേതാക്കളെ വീടുകളിൽ നിന്ന് കസ്റ്റഡിയിലെടുത്തതിനെയും ഹർജിയിൽ ചോദ്യം ചെയ്യുന്നുണ്ട്.
സിജെപി സമരം നേരിടാൻ കർശന നിയന്ത്രങ്ങൾ ആയിരുന്നു കേന്ദ്ര സർക്കാരും സുരക്ഷാ സേനകളും ഏർപ്പെടുത്തിയത്. കേന്ദ്ര സായുധ പൊലീസ് വിഭാഗത്തിലെ 23,000 പേരെയാണ് ഡല്‍ഹിയിൽ കേന്ദ്രം വിന്യസിച്ചിരുന്നത്. സമരം പൊളിക്കാനായി സമരനേതാക്കളെ നേരത്തെ കസ്റ്റഡിയിൽ എടുക്കുക എന്നതായിരുന്നു പൊലീസ് സ്വീകരിച്ച രീതി. ഇതനുസരിച്ച് സിജെപി സ്ഥാപകൻ അഭിജിത് ദീപ്‌കയെ വിമാനത്തിൽ നിന്ന് പൊലീസ് കസ്റ്റഡിയിൽ എടുത്തു. യൂട്യൂബർ ധ്രുവ് റാഠിയെ ഗുരുഗ്രമിലെ വസതിയിൽ നിന്നാണ് കസ്റ്റഡിയിൽ എടുത്തത്. പിന്നാലെ നിരവധി വിദ്യാർത്ഥി, ദേശീയ നേതാക്കളെയും അവർ ഉണ്ടായിരുന്നയിടത്തുനിന്ന് പൊലീസ് കസ്റ്റഡിയിൽ എടുത്തിരുന്നു.
