സാബു തൊട്ടിപ്പറമ്പില്
സിനിമയിലെ മാസ് ഡയലോഗുകളെ വെല്ലുന്ന മൂർച്ചയേറിയ രാഷ്ട്രീയ പ്രയോഗങ്ങളുമായി തമിഴ്നാട് മുഖ്യമന്ത്രി സി. ജോസഫ് വിജയ്. നിയമസഭയിൽ ഇന്നലെ നടത്തിയ പ്രസംഗം ദക്ഷിണേന്ത്യൻ രാഷ്ട്രീയത്തിൽ പുതിയ ചർച്ചകൾക്ക് വഴിതുറക്കുകയാണ്.
ഒരു ഭരണാധികാരി എന്ന നിലയിൽ തന്റെ നയങ്ങൾ വ്യക്തമാക്കാനും, അതേസമയം പ്രതിപക്ഷത്തിന്റെ ആരോപണങ്ങൾക്ക് കൃത്യമായ രാഷ്ട്രീയ മറുപടി നൽകാനും വിജയ് എന്ന ജനനായകന് ഈ പ്രസംഗത്തിലൂടെ സാധിച്ചു. മുൻ ഡി.എം.കെ ഭരണകാലത്തെ അഴിമതികളെ രൂക്ഷമായ ഭാഷയിലാണ് മുഖ്യമന്ത്രി സഭയിൽ തുറന്നുകാട്ടിയത്. ടാസ്മാക് ഉൾപ്പെടെയുള്ള സർക്കാർ സംവിധാനങ്ങളിൽ നിന്ന് വലിയ തുക പാർട്ടി ഫണ്ടുകളിലേക്ക് വകമാറ്റിയെന്ന എൻഫോഴ്സ്മെന്റ് ഡയറക്ടറേറ്റ് രേഖകൾ ഉദ്ധരിച്ചുകൊണ്ടായിരുന്നു അദ്ദേഹത്തിന്റെ കടന്നാക്രമണം.
പ്രതിപക്ഷത്തിന്റേത് വെറും അഴിമതിയല്ല, മറിച്ച് വ്യവസ്ഥാപിതമായ ‘ശാസ്ത്രീയ അഴിമതി’ ആണെന്ന് വിജയ് ആരോപിച്ചത് സഭയിൽ വലിയ ബഹളത്തിനും പ്രതിപക്ഷ നേതാക്കളുടെ വാക്കൗട്ടിനും കാരണമായി.
സഭയിലെ രാഷ്ട്രീയ തർക്കങ്ങൾക്കിടയിൽ പ്രതിപക്ഷത്തിന്റെ ചോദ്യ ശരങ്ങൾക്ക് മുഖ്യമന്ത്രി നൽകിയ വൺ-ലൈൻ മറുപടികൾ ഇതിനകം തന്നെ തമിഴ്നാട്ടിൽ തരംഗമായിക്കഴിഞ്ഞു. പ്രതിപക്ഷ നേതാവ് ഉദയനിധി സ്റ്റാലിനെ ലക്ഷ്യമിട്ട്, “പത്രങ്ങൾ കൃത്യമായി വായിച്ചിരുന്നെങ്കിൽ നിങ്ങൾക്ക് അത് അറിയാമായിരുന്നു” എന്ന അദ്ദേഹത്തിന്റെ പരിഹാസം രാഷ്ട്രീയ എതിരാളികളെ അക്ഷരാർത്ഥത്തിൽ നിശ്ശബ്ദരാക്കുന്നതായിരുന്നു. മുൻ മുഖ്യമന്ത്രി എം.കെ. സ്റ്റാലിന്റെ പഴയൊരു ആംഗ്യം സഭയിൽ അനുകരിച്ചുകൊണ്ട് വിജയ് നടത്തിയ പ്രകടനം മാധ്യമങ്ങളിലും വലിയ ചർച്ചയായി മാറിയിട്ടുണ്ട്.
പ്രസംഗത്തിൽ ഏറ്റവും ശ്രദ്ധേയമായതും ജനഹൃദയങ്ങൾ കീഴടക്കിയതും മുഖ്യമന്ത്രിയുടെ വൈകാരികമായ വാക്കുകളായിരുന്നു.
പ്രതിപക്ഷത്തിന്റെ കടുത്ത വ്യക്തിപരമായ വിമർശനങ്ങൾക്കുള്ള മറുപടിയായി എം.ജി.ആറിന്റെ പഴയൊരു രാഷ്ട്രീയ സിനിമാ ഗാനത്തിന്റെ പശ്ചാത്തലം ഓർമ്മിപ്പിച്ചുകൊണ്ട്, “തമിഴ്നാടാണ് എന്റെ വീട്, അവിടുത്തെ എട്ട് കോടി ജനങ്ങളാണ് എന്റെ ബന്ധുക്കൾ. ഈ സർക്കാർ അവർക്ക് വേണ്ടിയുള്ളതാണ്” എന്ന് അദ്ദേഹം പ്രഖ്യാപിച്ചു. സ്വന്തം കുടുംബത്തിന്റെ താല്പര്യങ്ങൾക്കപ്പുറം സംസ്ഥാനത്തെ മുഴുവൻ ജനങ്ങളെയും ഒരേ കണ്ണോടെ കാണുന്ന ഒരു ഭരണാധികാരിയുടെ പ്രഖ്യാപനമായിട്ടാണ് രാഷ്ട്രീയ നിരീക്ഷകർ ഈ വാക്കുകളെ വിലയിരുത്തുന്നത്.
ഭരണം കൈയാളിയ ആദ്യ നാളുകളിൽ തന്നെ, തമിഴക വെട്രി കഴകം എന്ന തന്റെ പാർട്ടിയെ അധികാരത്തിലെത്തിച്ച ജനങ്ങളോട് തനിക്ക് കൃത്യമായ ഉത്തരവാദിത്തമുണ്ടെന്ന് തെളിയിക്കുകയാണ് വിജയ്. കേവലം ഒരു സിനിമാതാരം എന്ന പരിഹാസവുമായി നേരിടാൻ വന്ന പ്രതിപക്ഷത്തിന്, ഭരണാധികാരിയുടെ ഗാംഭീര്യത്തോടെയും രാഷ്ട്രീയ തന്ത്രജ്ഞതയോടെയുമാണ് സി. ജോസഫ് വിജയ് മറുപടി നൽകിയിരിക്കുന്നത്. വരും ദിവസങ്ങളിൽ തമിഴ്നാട് രാഷ്ട്രീയം കൂടുതൽ ചൂടുപിടിക്കുമെന്നതിന്റെ വ്യക്തമായ സൂചനയാണ് നിയമസഭയിൽ ഇന്നലെ കണ്ടത്.
