പ്രശസ്ത അന്വേഷണാത്മക മാധ്യമപ്രവർത്തകനും മുൻ തെഹൽക്ക എഡിറ്ററുമായ മാത്യു സാമുവൽ, അമേരിക്കയിൽ നടക്കുന്ന ഇൻഡോ-അമേരിക്കൻ പ്രസ് ക്ലബ് (IAPC) സംഘടിപ്പിക്കുന്ന 11-ാമത് വാർഷിക അന്തർദേശീയ മീഡിയ സമ്മേളനത്തിൽ Guest of Honor (വിശിഷ്ട അതിഥി) ആയി പങ്കെടുക്കും.
ഒക്ടോബർ 16 മുതൽ 18 വരെ ഒഹായോ സംസ്ഥാനത്തെ സിൻസിനാറ്റിയിലെ ഷാരോൺവില്ലിലുള്ള മാരിയറ്റ് ഡെൽറ്റ ഹോട്ടലിലാണ് സമ്മേളനം നടക്കുന്നത്. പരിപാടിയിൽ പങ്കെടുക്കാൻ ഇൻഡോ-അമേരിക്കൻ പ്രസ് ക്ലബ് ഔദ്യോഗിക ക്ഷണക്കത്ത് മാത്യു സാമുവലിന് കൈമാറിയിട്ടുണ്ട്.
ലോകത്തിന്റെ വിവിധ ഭാഗങ്ങളിൽ നിന്നുള്ള പ്രമുഖ മാധ്യമപ്രവർത്തകരും എഡിറ്റർമാരും എഴുത്തുകാരും മാധ്യമവിദഗ്ധരും സാമൂഹിക നേതാക്കളും സമ്മേളനത്തിൽ പങ്കെടുക്കും. മാത്യു സാമുവലിന്റെ സാന്നിധ്യം സമ്മേളനത്തിന് കൂടുതൽ പ്രൗഢി പകരുമെന്നും, അദ്ദേഹത്തിന്റെ ദീർഘകാല അന്വേഷണാത്മക മാധ്യമപ്രവർത്തന അനുഭവം മാധ്യമരംഗത്തിന് പ്രചോദനമാകുമെന്നും സംഘാടകർ ക്ഷണക്കത്തിൽ വ്യക്തമാക്കുന്നു.
സമൂഹത്തിനും മാധ്യമരംഗത്തിനും നൽകിയ ശ്രദ്ധേയമായ സംഭാവനകളെ ആദരിച്ച് സമ്മേളനത്തോടനുബന്ധിച്ച് പ്രസിദ്ധീകരിക്കുന്ന സ്മരണികയിൽ മാത്യു സാമുവലിന്റെ സന്ദേശവും ചിത്രവും ഹ്രസ്വ പരിചയവും ഉൾപ്പെടുത്തുമെന്നും ഇൻഡോ-അമേരിക്കൻ പ്രസ് ക്ലബ് അറിയിച്ചു. ഉത്തര അമേരിക്കയിലെ ഇന്ത്യൻ വംശജനായ മാധ്യമപ്രവർത്തകരുടെ ഏറ്റവും വലിയ സംഘടനകളിലൊന്നായ ഐഎപിസി സംഘടിപ്പിക്കുന്ന ഈ സമ്മേളനം ആഗോള മാധ്യമപ്രവർത്തകരുടെ ശ്രദ്ധാകേന്ദ്രമാകുമെന്നാണ് വിലയിരുത്തപ്പെടുന്നത്.
