തൃശൂർ: കോണ്ഗ്രസിലെ മുഖ്യമന്ത്രി പോര് കടുക്കുന്നതിനിടെ കെ സി വേണുഗോപാലിനായി ഫ്ലക്സ് വെച്ച സിപിഎം നേതാവ് വെട്ടിലായി.
തൃശ്ശൂരിലെ വാടാനപ്പള്ളിയിലാണ് സിപിഎം നേതാവിനെ സിസിടിവി ചതിച്ചത്. വാടാനപ്പള്ളി ലോക്കല് കമ്മിറ്റി അംഗം അരവശേരി മുഹമ്മദാണ് സേവ് കോണ്ഗ്രസിന്റെ പേരില് കെ.സി.വേണുഗോപാലിന്റെ ഫ്ലെക്സ് ബോർഡ് സ്ഥാപിച്ചത്. ഇതിന്റെ ദൃശ്യങ്ങള് സിസിടിവിയില് പതിയുകയായിരുന്നു.
കഴിഞ്ഞ രാത്രിയാണ് കെ.സി.വേണുഗോപാലിന്റെ ഫോട്ടോ വച്ച, ‘കെ.സി നയിക്കട്ടെ’ എന്നെഴുതിയ ഫ്ലെക്സ് ബോർഡ് പഞ്ചായത്ത് ഓഫിസിന് മുന്നില് പ്രത്യക്ഷപ്പെട്ടത്. ഇതിന്റെ ഫോട്ടോ അരവശേരി മുഹമ്മദ് ഫെയ്സ് ബുക്കില് പോസ്റ്റ് ചെയ്യുകയും ചെയ്തു. എന്നാല്, അരവശേരി മുഹമ്മദ് ബോർഡ് വയ്ക്കുന്നത് സിസിടിവിയില് തെളിഞ്ഞതോടെ നാട്ടുകാരെല്ലാം വിവരമറിഞ്ഞു.
!യുഡിഎഫ് മണ്ഡലം കമ്മിറ്റി പേരില് പൊലീസില് പരാതി നല്കി. പ്രതിഷേധ പ്രകടനവും നടത്തി. സിപിഎമ്മിന്റെ ഗൂഢാലോചനയാണ് ഇതിന്റെ പിന്നിലെന്ന് യുഡിഎഫ് നേതൃത്വം ആരോപിച്ചു.
