സെനഗൽ: തീരത്തേക്ക് ഒഴുകിയെത്തിയ ബോട്ടിൽ കണ്ടത് ഞെട്ടിക്കുന്ന കാഴ്ച. അഴുകിയ നിലയിലുള്ള മുപ്പതിലേറെ മൃതദേഹങ്ങളാണ് ബോട്ടിൽ കണ്ടെത്തിയത്. സെനഗൽ തീരത്തേക്ക് ഒഴുകിയെത്തിയ ബോട്ടിലാണ് അഴുകിയ മൃതദേഹങ്ങൾ കണ്ടെത്തിയത്.
രാജ്യ തലസ്ഥാനമായ ഡാകറിൽ നിന്ന് 70 കിലോമീറ്റർ അകലെയായാണ് മരം കൊണ്ട് നിർമ്മിച്ച ബോട്ട് കണ്ടെത്തിയത്. തിങ്കളാഴ്ച തുറമുഖത്തേക്ക് നാവിക സേനയാണ്
കെട്ടിവലിച്ച് കൊണ്ടുവന്നത്.
മൃതദേഹങ്ങൾ ജീർണിച്ച് തുടങ്ങിയ അവസ്ഥയിൽ ആണെന്നും അതിനാല്‍ തന്നെ തിരിച്ചറിയൽ അടക്കമുള്ള പ്രവർത്തനങ്ങൾ ദുഷ്കരമായിരിക്കുമെന്ന് അധികൃതർ പറഞ്ഞു. മൃതദേഹങ്ങളിൽ നിന്ന് ആളെ തിരിച്ചറിയാനുള്ള സാമ്പിളുകള്‍ ലഭിക്കുമോ എന്നതിനെ കുറിച്ച് അധികൃതർ പരിശോധന നടത്തുകയാണ്.
അടുത്ത കാലത്തായി സെനഗലില്‍ നിന്ന് സ്പെയിനിലെ കാനറി ദ്വീപുകളിലേക്ക് പോകുന്ന കുടിയേറ്റക്കാരുടെ എണ്ണത്തില്‍ വലിയ രീതിയില്‍ വർദ്ധനവുണ്ടായിട്ടുണ്ട്.
അറ്റ്ലാൻ്റിക് സമുദ്രത്തിലൂടെ 1,500 കിലോമീറ്ററിലധികം യാത്ര ചെയ്താലാണ് ഈ കുടിയേറ്റം സാധ്യമാകുക. മൃതദേഹങ്ങള്‍ അഴുകിയ നില പരിഗണിക്കുമ്പോള്‍ ബോട്ട് ആദ്യം കണ്ടെത്തിയ മത്സ്യത്തൊഴിലാളികള്‍ കണ്ടെത്തുന്നതിന് ദിവസങ്ങള്‍ക്ക് മുൻപ് കുടിയേറ്റക്കാർ മരണപ്പെട്ടിരിക്കാമെന്നാണ് സൂചന.
നിരവധി ദിവസങ്ങള്‍ അറ്റ്ലാൻ്റിക് സമുദ്രത്തില്‍ ഒഴുകിയതിന് പിന്നാലെയാണ് മത്സ്യത്തൊഴിലാളികള്‍ ബോട്ട് കണ്ടെത്തിയതെന്നാണ് ലഭ്യമാകുന്ന വിവരം.
ബോട്ട് എവിടെ നിന്ന് എവിടേക്കാണ് യാത്ര പുറപ്പെട്ടതെന്നും ബോട്ടില്‍ എത്ര യാത്രക്കാർ ഉണ്ടായിരുന്നുവെന്നും കണ്ടെത്താനുള്ള ശ്രമങ്ങളും സൈന്യം ഊർജ്ജിതമാക്കിയിട്ടുണ്ട്.
ഓഗസ്റ്റ് മാസത്തില്‍ സെനഗലുകാരുടേയെന്ന് സംശയിക്കപ്പെടുന്ന 14ലേറെ മൃതദേഹങ്ങള്‍ ഡൊമിനിക്കൻ റിപ്പബ്ലിക്കിൻ്റെ തീരത്ത് മത്സ്യത്തൊഴിലാളികള്‍ കണ്ടെത്തിയിരുന്നു.
അടുത്തിടെ സമുദ്രത്തിലൂടെയുള്ള കുടിയേറ്റത്തിനിടയിലെ പൗരന്മാർ കൊല്ലപ്പെടുന്ന സംഭവങ്ങള്‍ വർദ്ധിച്ചതിന് പിന്നാലെ അനധികൃത കുടിയേറ്റം നിയന്ത്രിക്കാനായി പത്ത് വർഷ പദ്ധതി നടപ്പിലാക്കുമെന്ന് സെനഗല്‍ വ്യക്തമാക്കിയിരുന്നു.
തൊഴില്‍ ഇല്ലായ്മ, ദാരിദ്ര്യം, ആഭ്യന്തര സംഘർഷം എന്നിവയാണ് യുവതലമുറയെ അടക്കം അറ്റ്ലാന്റിക്കിലെ വെല്ലുവിളികള്‍ മറികടന്ന് കാനറി ദ്വീപുകളിലേക്ക് എത്താനായി പ്രേരിപ്പിക്കുന്നത്.
