ഭോപാല്: റൈറ്റ് സഹോദരന്മാർ വിമാനമുണ്ടാക്കുന്നതിന് മുൻപേ ഇന്ത്യയ്ക്ക് പുഷ്പകവിമാനം ഉണ്ടായിരുന്നതായി കേന്ദ്രമന്ത്രിയും ബിജെപി നേതാവുമായ ശിവരാജ് സിങ് ചൗഹാൻ.
ഭോപാല് ഐസറില് നടന്ന ചടങ്ങിലായിരുന്നു കേന്ദ്രമന്ത്രിയുടെ പരാമർശം. ആദ്യത്തെ ബഹിരാകാശ സഞ്ചാരി ഹനുമാൻ ആണെന്ന ബിജെപി നേതാവ് അനുരാഗ് ഠാക്കൂറിന്റെ പ്രസ്താവനയ്ക്ക് പിന്നാലെയാണ് ശിവരാജ് സിങ് ചൗഹാന്റെ ആദ്യവിമാനത്തെക്കുറിച്ചുള്ള പരാമർശം.
”റൈറ്റ് സഹോദരന്മാർ വിമാനം കണ്ടുപിടിക്കുന്നതിന് വളരെ മുൻപുതന്നെ നമുക്ക് പുഷ്പകവിമാനം ഉണ്ടായിരുന്നു. ഇന്ന് നമ്മുടെ കൈവശമുള്ള ഡ്രോണുകളും മിസൈലുകളുമെല്ലാം ആയിരക്കണക്കിന് വർഷങ്ങള്ക്ക് മുൻപുതന്നെ നമുക്കുണ്ടായിരുന്നു. ഇതെല്ലാം നമ്മള് മഹാഭാരതത്തില് വായിച്ചിട്ടുണ്ട്. നമ്മുടെ രാജ്യത്തിന്റെ ശാസ്ത്ര, സാങ്കേതികവിദ്യ ആയിരക്കണക്കിന് വർഷങ്ങള്ക്ക് മുൻപുതന്നെ വികസിപ്പിച്ചെടുത്തതാണ്”, ശിവരാജ് സിങ് ചൗഹാൻ പറഞ്ഞു.
നേരത്തേ മധ്യപ്രദേശ് മുഖ്യമന്ത്രിയായിരിക്കെയും ശിവരാജ് സിങ് പുഷ്പകവിമാനത്തെക്കുറിച്ച് സമാനരീതിയിലുള്ള പരാമർശം നടത്തിയിരുന്നു. ഇതേകാര്യങ്ങളാണ് ഭോപാല് ഐസറില് നടന്ന ചടങ്ങിലും അദ്ദേഹം ആവർത്തിച്ചത്. ദിവസങ്ങള്ക്ക് മുൻപാണ് ബിജെപി നേതാവായ അനുരാഗ് ഠാക്കൂർ ആദ്യ ബഹിരാകാശ സഞ്ചാരി ഹനുമാനാണെന്ന പ്രസ്താവന നടത്തിയത്. ദേശീയ ബഹിരാകാശദിനത്തില് ഹിമാചല്പ്രദേശിലെ ഒരു സ്കൂളില് നടന്ന ചടങ്ങില് പ്രസംഗിക്കുന്നതിനിടെയായിരുന്നു അദ്ദേഹത്തിന്റെ പരാമർശം.
