ന്യൂഡൽഹി:അമേരിക്കയിൽ നിന്ന് നാടുകടത്തപ്പെട്ട ഇന്ത്യൻ കുടിയേറ്റക്കാരെ വഹിച്ചുകൊണ്ടുള്ള രണ്ടാമത്തെ വിമാനം ഫെബ്രുവരി 15 ന് അമൃ സറിൽ ഇറങ്ങുമെന്ന് വൃത്തങ്ങൾ അറിയിച്ചു. അതിനുശേഷം നാടുകടത്തപ്പെട്ട ഇന്ത്യക്കാരുടെ മറ്റൊരു വിമാനവും എത്തുമെന്ന് പ്രതീക്ഷിക്കുന്നു. പ്രസിഡൻ്റ് ഡൊണാൾഡ് ട്രംപിൻ്റെ ഭരണത്തിനു കീഴിലുള്ള ഏറ്റവും വലിയ നാടുകടത്തൽ പ്രവർത്തനങ്ങളിലൊന്നായി ഇത് അടയാളപ്പെടുത്തി. ഫെബ്രുവരി 5 ന് നാടുകടത്തപ്പെട്ട 104 കുടിയേറ്റക്കാരെ വഹിച്ചുകൊണ്ടുള്ള ഒരു യുഎസ് സൈനിക വിമാനം അമൃത്സറിൽ എത്തിയതിനെ തുടർന്നാണിത്.
അമൃസറിൽ വിമാനം ഇറക്കാനുള്ള തീരുമാനം വിവാദത്തിന് തിരികൊളുത്തിയിട്ടുണ്ട്, ബിജെപി നേതൃത്വത്തിലുള്ള കേന്ദ്ര സർക്കാർ പഞ്ചാബിനെ മനഃപൂർവ്വം ലക്ഷ്യം വയ്ക്കുന്നുവെന്ന് പഞ്ചാബ് ധനമന്ത്രി ഹർപാൽ ചീമ ആരോപിച്ചതായി ‘ഇന്ത്യാ ടുഡേ’റിപ്പോർട്ട് ചെയ്യുന്നു.
“നാടുകടത്തപ്പെട്ട ഇന്ത്യക്കാരെ വഹിച്ചുകൊണ്ടുള്ള വിമാനങ്ങൾ അമൃ സറിൽ ഇറങ്ങുന്നുവെന്ന് ഉറപ്പാക്കിക്കൊണ്ട് പഞ്ചാബിനെ അപകീർത്തിപ്പെടുത്താനാണ് സർക്കാർ ആഗ്രഹിക്കുന്നത്. ഹരിയാനയോ ഗുജറാത്തിലോ എന്തുകൊണ്ട് അങ്ങനെ ചെയ്യുന്നില്ല. പഞ്ചാബിന്റെ പ്രതിച്ഛായ തകർക്കാനുള്ള ബിജെപിയുടെ ശ്രമമാണിതെന്ന് വ്യക്തമാണ്. പകരം ഈ വിമാനം അഹമ്മദാബാദിൽ ഇറക്കണം” ചീമ പറഞ്ഞു.
“487 ഇന്ത്യൻ പൗരന്മാരെ” നീക്കം ചെയ്യുന്നതിനുള്ള ഉത്തരവുകൾ പുറപ്പെടുവിച്ചതായി യുഎസ് ഇന്ത്യയെ അറിയിച്ചിട്ടുണ്ടെന്ന് വിദേശകാര്യ സെക്രട്ടറി വിക്രം മിശ്ര നേരത്തെ സ്ഥിരീകരിച്ചിരുന്നു. അനധികൃത മാർഗങ്ങളിലൂടെ യുഎസിലേക്ക് കടക്കാൻ ശ്രമിച്ച നാടുകടത്തപ്പെട്ടവർ, യാത്രയ്ക്കിടെ മനുഷ്യത്വരഹിതമായ പെരുമാറ്റത്തിന് വിധേയരായെന്നും, വിമാനത്തിലുടനീളം കൈകളും കാലുകളും ബന്ധിക്കപ്പെട്ടിട്ടുണ്ടെന്നും, ലാൻഡിംഗിന് ശേഷം മാത്രം വിലങ്ങുകൾ അഴിച്ചുമാറ്റിയെന്നും ആരോപണവും ഉയർന്നിരുന്നു.
മോശം പെരുമാറ്റത്തെക്കുറിച്ചുള്ള വിഷയത്തിൽ, മിസ്രി അതിനെ “സാധുവായ ആശങ്ക” എന്ന് വിളിക്കുകയും ഇന്ത്യൻ സർക്കാർ യുഎസ് അധികാരികളുമായി ഇക്കാര്യം ഉന്നയിക്കുമെന്ന് ഉറപ്പ് നൽകുകയും ചെയ്തു.
യുഎസിൽ നിന്നുള്ള ഇന്ത്യൻ കുടിയേറ്റക്കാരെ നാടുകടത്തുന്നത് വർഷങ്ങളായി തുടരുകയാണെന്നും 2009 മുതൽ 15,668 അനധികൃത ഇന്ത്യൻ കുടിയേറ്റക്കാരെ നാടുകടത്തിയതായും വിദേശകാര്യ മന്ത്രി എസ് ജയശങ്കർ രാജ്യസഭയെ അറിയിച്ചു. ഈ പ്രക്രിയ പുതിയതല്ലെങ്കിലും, പൗരന്മാരോട് ന്യായമായ പെരുമാറ്റം ഉറപ്പാക്കാൻ സർക്കാർ പ്രതിജ്ഞാബദ്ധമാണെന്ന് അദ്ദേഹം ഊന്നിപ്പറഞ്ഞു.
