പുണെ: നിക്ഷേപകർക്ക് പ്രതിമാസം വൻ ലാഭം വാഗ്ദാനം ചെയ്ത് 88 കോടി രൂപ തട്ടിയെടുത്ത കേസിൽ മുഖ്യപ്രതി അവിനാഷ് രത്തോഡിന്റെ ഭാര്യ വിശാഖ രത്തോഡിനെയും യു.എ.ഇയിൽ നിന്ന് ഇന്ത്യയിലെത്തിച്ചു.
ഇന്റർപോൾ റെഡ് നോട്ടീസിന്റെ അടിസ്ഥാനത്തിൽ സി.ബി.ഐ, വിദേശകാര്യ മന്ത്രാലയം , ആഭ്യന്തര മന്ത്രാലയം എന്നിവയുടെ ഏകോപിതമായ നീക്കത്തിലൂടെയാണ് വിശാഖയെ തിങ്കളാഴ്ച ( ഓഗസ്റ്റ് 3-ന്) പുണെയിലെത്തിച്ചത്. തുടർന്ന് മഹാരാഷ്ട്ര പോലീസ് ഇവരെ കസ്റ്റഡിയിലെടുത്തു.
വിവിധ നിക്ഷേപ പദ്ധതികളിൽ പണം മുടക്കിയാൽ ഉയർന്ന പ്രതിമാസ ലാഭം ഉറപ്പുനൽകിയായിരുന്നു ദമ്പതികൾ തട്ടിപ്പ് നടത്തിയത്. എന്നാൽ, ഈ തുക മറ്റു പല ബാങ്ക് അക്കൗണ്ടുകളിലേക്കും ഡീമാറ്റ് അക്കൗണ്ടുകളിലേക്കും വകമാറ്റി ക്രമക്കേട് നടത്തുകയായിരുന്നുവെന്ന് അന്വേഷണ സംഘം കണ്ടെത്തി.
കേസിലെ പ്രധാന സൂത്രധാരനായ അവിനാഷ് രത്തോഡിനെ ജൂലൈ 23-ന് യു.എ.ഇയിൽ നിന്ന് നാടുകടത്തി ബോംബെ വിമാനത്താവളത്തിൽ ഇറങ്ങിയ ഉടൻ പുണെ പോലീസിന്റെ സാമ്പത്തിക കുറ്റകൃത്യ വിഭാഗം (EOW) അറസ്റ്റ് ചെയ്തിരുന്നു. കോടതി ഇയാളെ 10 ദിവസത്തെ പോലീസ് കസ്റ്റഡിയിൽ വിട്ടിരിക്കുകയാണ്.
ഇതിന് പിന്നാലെയാണ് വിശാഖയെയും ഇന്ത്യയിലെത്തിച്ച് നിയമനടപടികൾ ആരംഭിച്ചത്.
