അബുദാബി: കുറഞ്ഞ ചെലവിൽ കൂടുതൽ സർവീസുകൾ ഒരുക്കി അബുദാബി സായിദ് രാജ്യാന്തര വിമാനത്താവളം ഇന്ത്യൻ പ്രവാസികളെ ക്ഷണിക്കുന്നു. കേരളം അടക്കം ഇന്ത്യൻ വിമാനത്താവളങ്ങളിലേക്കു താരതമ്യേന കുറഞ്ഞ ടിക്കറ്റ് നിരക്കാണ് അബുദാബിയിൽ നിന്ന്.
കൂടുതൽ വിമാനങ്ങളുടെ സർവീസുകൾ ആരംഭിച്ചതോടെ ദുബായ് അടക്കമുള്ള എമിറേറ്റുകളിൽ നിന്ന് പ്രവാസികൾ അബുദാബിയിൽ എത്തി നാട്ടിലേക്കു യാത്ര ചെയ്യുന്നു. വിവിധ എമിറേറ്റുകളിൽ നിന്നു സായിദ് രാജ്യാന്തര വിമാനത്താവളത്തിലേക്കു നേരിട്ടു ബസ് സർവീസുമുണ്ട്.
വിമാനത്തിന്റെ സമയം അനുസരിച്ചു ബസുകൾ ബുക്ക് ചെയ്യാം. നവി മുംബൈ, ഇൻഡോർ, ലക്നൗ എന്നിവിടങ്ങളിലേക്ക് എയർ ഇന്ത്യ എക്സ്പ്രസ് കഴിഞ്ഞ ദിവസം പുതിയ സർവീസുകൾ ആരംഭിച്ചു. 7 മുതൽ ഗുവാഹത്തിയിലേക്കും സർവീസ് ആരംഭിക്കും.
ഇന്ത്യയുടെ വടക്കു കിഴക്കൻ മേഖലയിലേക്കും അബുദാബിയിൽ നിന്നു നേരിട്ടു സർവീസുകൾ ആരംഭിക്കാൻ ഒരുങ്ങുകയാണ് എയർ ഇന്ത്യ. കൂടുതൽ ഇന്ത്യൻ നഗരങ്ങളിലേക്ക് സർവീസുകൾ ആവശ്യമായി വരുന്നത് ഇരു രാജ്യങ്ങൾക്കും ഇടയിലെ ബന്ധം ശക്തമാകുന്നതിന്റെ തെളിവാണെന്ന് അബുദാബി എയർപോർട്ട് സിഇഒ അഹമ്മദ് ജുമാ അൽ ഷമിസി പറഞ്ഞു. എയർ ഇന്ത്യാ എക്സ്പ്രസിന്റെ ഏറ്റവും പ്രധാന രാജ്യാന്തര സർവീസാണ് യുഎഇയിലേക്കുള്ളതെന്നും എക്സ്പ്രസിന്റെ വളർച്ചയിൽ അബുദാബി നിർണായകമാണെന്നും ചെയർമാൻ നിപുൺ അഗർവാൾ പറഞ്ഞു.
