നൈജര്‍: വടക്കുകിഴക്കന്‍ നൈജീരിയയിലെ യോബെയില്‍ ബോക്കോ ഹറാം ജിഹാദികള്‍ നടത്തിയ ആക്രമണത്തില്‍ 81 പേര്‍ കൊല്ലപ്പെട്ടതായി റിപ്പോർട്ട്.
നിരവധി പേരെ കാണാതാവുകയും ചെയ്തതായി പ്രാദേശിക ഉദ്യോഗസ്ഥരെ ഉദ്ധരിച്ച്‌ വാര്‍ത്താ ഏജന്‍സി എഎഫ്പി റിപ്പോര്‍ട്ട് ചെയ്തു.
ആയുധധാരികളായ 150 ഓളം ബോക്കോ ഹറാം തീവ്രവാദികള്‍ മാഫ വാര്‍ഡിനെ ആക്രമിക്കുകയായിരുന്നുവെന്ന് യോബെ സ്റ്റേറ്റ് പൊലീസ് വക്താവ് അബ്ദുള്‍കരിം ഡുംഗസ് പറഞ്ഞു.
50 ലധികം വാഹനങ്ങളിലെത്തിയ ഇവരുടെ പക്കല്‍ റൈഫിളുകളും റോക്കറ്റ് പ്രൊപ്പല്‍ഡ് ഗ്രനേഡുകളും ഉണ്ടായിരുന്നതായാണ് വിവരം. നിരവധി കെട്ടിടങ്ങളും സംഘം അഗ്നിക്കിരയാക്കി. മരണ നിരക്ക് ഉയരാനാണ്‌ സാധ്യത.
ബോക്കോ ഹറാം പോരാളികളെന്ന് സംശയിക്കുന്ന രണ്ട് പേരെ പ്രാദേശിക ജാഗ്രതാ സമിതിക്കാര്‍ കൊലപ്പെടുത്തിയതിനുള്ള പ്രതികാരമാണ് യോബെയിലെ മാഫ ഗ്രാമത്തിലെ ആക്രമണമെന്ന് പൊലീസ് വക്താവ് പറഞ്ഞു.
മാര്‍ക്കറ്റില്‍ വെടിയുതിര്‍ക്കുകയും കെട്ടിടങ്ങള്‍ കത്തിക്കുകയും ചെയ്ത ശേഷം ഇവർ പ്രദേശവാസികളെ വെടിവയ്ക്കുകയായിരുന്നു. ഗ്രാമത്തിലേക്കുള്ള പാതകളിലും ഇവർ ആക്രമണം നടത്തി.
കൊല്ലപെട്ടവരുടെ മൃതദേഹങ്ങള്‍ നിലവില്‍ ബാബന്‍ഗിഡ ജനറല്‍ ആശുപത്രിയില്‍ സൂക്ഷിച്ചിരിക്കുകയാണ്. നിരവധി താമസക്കാരെ കാണാതായതായും ചില മൃതദേഹങ്ങള്‍ ഇപ്പോഴും മുള്‍പടര്‍പ്പില്‍ ഉള്ളതായും യോബെ- മാഫ മേഖലയിലെ സൈനിക വക്താവ് പറഞ്ഞു.
