എബി ജോയ്
പുൽപ്പള്ളി
ക്രൈസ്തവ ജീവിതം എന്നത് ക്രിസ്തുവിന്റെ ശരീരമായ സഭയോട് ചേർന്നുനിന്നുള്ള ഒരു വിശുദ്ധ യാത്രയാണ്. എന്നാൽ ഇന്ന് പല സഭകളിലും കണ്ടുവരുന്ന ഒരു വലിയ ആത്മീയ വിപത്താണ് ‘കുറ്റപ്പെടുത്തലുകളും ഏഷണികളും’.
ദൈവദാസന്റെ പ്രസംഗത്തിലെ പിഴവുകൾ തേടി നടക്കാനും, വ്യക്തികളുടെ സ്വകാര്യ സംഭാഷണങ്ങൾ മാന്തിപ്പുറത്തിടാനും സമയം കണ്ടെത്തുന്ന ഒരു വിഭാഗം വിശ്വാസികൾ സഭയുടെ ആത്മീയ വളർച്ചയ്ക്ക് തടസ്സമായി നിൽക്കുന്നു. ഇത്തരക്കാർ സഭയുടെ അനുഗ്രഹമല്ല, മറിച്ച് ശാപമായി മാറുകയാണ്.
നിങ്ങൾ കേൾക്കുന്നത് ആത്മീയ വിഷമാണ്
നിങ്ങളോട് ഒരാൾ മറ്റൊരു സഹോദരന്റെയോ ദൈവദാസന്റെയോ കുറ്റം പറയാൻ വരുന്നുണ്ടെങ്കിൽ, അവർ നിങ്ങളുടെ ചെവിയെ ഒരു മാലിന്യക്കുട്ടയായാണ് കാണുന്നത് എന്ന് തിരിച്ചറിയുക. വിശുദ്ധ ബൈബിൾ ഗൗരവമായി മുന്നറിയിപ്പ് നൽകുന്നു:
“ഏഷണി പറയുന്നവന്റെ വാക്ക് സ്വാദിഷ്ഠഭോജനംപോലെ ഇരിക്കുന്നു; അത് വയറ്റിന്റെ അറകളിലേക്ക് ഇറങ്ങിച്ചെല്ലുന്നു.” (സദൃശ്യവാക്യങ്ങൾ 18:8)
കുറ്റം പറയുന്നവനേക്കാൾ വലിയ കുറ്റവാളി അത് ആസ്വദിച്ചു കേൾക്കുന്നവനാണ്. നിങ്ങളോട് കുറ്റം പറയാൻ വരുന്നവർ നിങ്ങളുടെ സമാധാനത്തെയും, ആത്മീയ സന്തോഷത്തെയും, നിങ്ങളുടെ തലമുറകളുടെ അനുഗ്രഹത്തെയുമാണ് കവർന്നെടുക്കുന്നത്. അത്തരക്കാരെ കേൾക്കാതിരിക്കുക എന്നത് നിങ്ങളുടെ ആത്മീയ സുരക്ഷയ്ക്ക് അത്യന്താപേക്ഷിതമാണ്.
വാക്കുകൾ കൊണ്ടുള്ള കൊലപാതകം: ക്രിസ്തുവിനെ മുറിപ്പെടുത്തൽ
മറ്റൊരാളെ വാക്കുകൾ കൊണ്ട് കൊല്ലുന്നവർ ക്രിസ്തുവിനെയാണ് മുറിപ്പെടുത്തുന്നത് എന്ന് നാം തിരിച്ചറിയണം. സഭ ക്രിസ്തുവിന്റെ ശരീരവും വിശ്വാസികൾ അതിന്റെ അവയവങ്ങളുമാണ് (1 കൊരിന്ത്യർ 12:27). ശരീരത്തിലെ ഒരു അവയവത്തെ നിങ്ങൾ നാവുകൊണ്ട് തകർക്കുമ്പോൾ, അത് ക്രിസ്തുവിന്റെ ശരീരത്തെ തന്നെയാണ് മുറിപ്പെടുത്തുന്നത്.
“മരണവും ജീവനും നാവിന്റെ അധികാരത്തിൽ ഇരിക്കുന്നു” (സദൃശ്യവാക്യങ്ങൾ 18:21). ശാരീരികമായ കൊലപാതകത്തേക്കാൾ ഭീകരമാണ് ഒരാളുടെ സ്വഭാവത്തെയോ ശുശ്രൂഷയെയോ വ്യാജാരോപണങ്ങൾ വഴി ഇല്ലാതാക്കുന്നത്. നിങ്ങൾ എറിയുന്ന ഓരോ വാക്കിന്റെ കല്ലും ചെന്നുപതിക്കുന്നത് ക്രിസ്തുവിന്റെ ഹൃദയത്തിലേക്കാണ്. അവന്റെ അവയവങ്ങളെ തകർക്കുന്നവർക്ക് എങ്ങനെ അവന്റെ അനുഗ്രഹം പ്രാപിക്കാൻ കഴിയും?
ദൈവദാസനെതിരെയുള്ള നാവുകൾ
ദൈവം ആക്കിവെച്ചിരിക്കുന്ന ശുശ്രൂഷകരെ വാക്കുകൾ കൊണ്ട് വേട്ടയാടുന്നവർ ഭയപ്പെടണം. കുറവുകൾ ഇല്ലാത്ത മനുഷ്യരില്ല, എന്നാൽ ആ കുറവുകളെ ചർച്ചാവിഷയമാക്കുന്നത് ദൈവഹിതമല്ല.
“എന്റെ അഭിഷിക്തന്മാരെ തൊടരുത്; എന്റെ പ്രവാചകന്മാർക്ക് ദോഷം ചെയ്യരുത്.” (സങ്കീർത്തനങ്ങൾ 105:15)
വർഷങ്ങളായി ആരാധനയിൽ സംബന്ധിച്ചിട്ടും, വചനം കേട്ടിട്ടും നിങ്ങളുടെ ജീവിതത്തിൽ ഒരു ഗതിപിടിക്കാത്തത് എന്തുകൊണ്ടാണെന്ന് ചിന്തിച്ചിട്ടുണ്ടോ? സഭയിലും ദൈവദാസനെതിരെയും അസമാധാനം വിതയ്ക്കുന്ന നിങ്ങളുടെ ഈ സ്വഭാവമാണ് നിങ്ങളുടെ അനുഗ്രഹങ്ങളെ തടഞ്ഞുനിർത്തുന്നത്.
നാവിനെ നിയന്ത്രിക്കാത്ത ഭക്തി വ്യർത്ഥം
യാക്കോബ് ശ്ലീഹായുടെ വാക്കുകൾ ഓരോ വിശ്വാസിയും ഗൗരവമായി ചിന്തിക്കേണ്ടതാണ്:
“ഒരുവൻ ഭക്തൻ എന്ന് സ്വയം നിരൂപിച്ചുകൊണ്ട് തന്റെ നാവിനെ അടക്കാതെ തന്റെ ഹൃദയത്തെ വഞ്ചിക്കുന്നു എങ്കിൽ അവന്റെ ഭക്തി വ്യർത്ഥമത്രേ.” (യാക്കോബ് 1:26)
പ്രായമായിട്ടും വിശ്വാസത്തിൽ വർഷങ്ങൾ പിന്നിട്ടിട്ടും നിങ്ങൾ നന്നാവാത്തതിന്റെ കാരണം നിങ്ങളുടെ ഈ നാവാണ്. മറ്റുള്ളവരെ നാവുകൊണ്ട് മുറിപ്പെടുത്തിക്കൊണ്ട് നിങ്ങൾക്ക് ദൈവത്തെ പ്രസാദിപ്പിക്കാൻ കഴിയില്ല.
നാം സ്വീകരിക്കേണ്ട കർശന നിലപാടുകൾ
അകറ്റി നിർത്തുക: മറ്റുള്ളവരുടെ കുറ്റം പറയാൻ വരുന്നവർ എത്ര അടുത്ത സുഹൃത്തോ ബന്ധുവോ ആകട്ടെ, അത്തരക്കാരെ വീട്ടിൽ കയറ്റാതിരിക്കുക. അവർ കൊണ്ടുവരുന്നത് വിഭജനത്തിന്റെയും നാശത്തിന്റെയും ആത്മാവിനെയാണ്.
വഴക്കുകൾ ഒഴിവാക്കുക: “വിറക് ഇല്ലാഞ്ഞാൽ തീ കെട്ടുപോകും; ഏഷണി ഇല്ലാഞ്ഞാൽ കലഹം അടങ്ങും.” (സദൃശ്യവാക്യങ്ങൾ 26:20). നിങ്ങൾ കേൾക്കാൻ തയ്യാറാകാതിരുന്നാൽ ആ ഏഷണി അവിടെ അവസാനിക്കും.
സഭയെ കെട്ടുപണി ചെയ്യുക: സഭയിൽ ഭിന്നത ഉണ്ടാക്കുന്നവരല്ല, സമാധാനം ഉണ്ടാക്കുന്നവരാകട്ടെ ദൈവമക്കൾ.
സഭയിലും ദൈവദാസനെതിരെയും കുറ്റം പറയുന്നത് ഇന്നുതന്നെ നിർത്തുക, അല്ലെങ്കിൽ നീ ആത്മീയമായി നശിച്ചുപോകും. നിന്റെ വാക്കുകൾ മറ്റുള്ളവരെ തകർക്കുന്നതല്ല, മറിച്ച് കെട്ടുപണി ചെയ്യുന്നതാകട്ടെ. സഭ എന്നത് സ്നേഹത്തിന്റെ കൂടാരമാകട്ടെ. അവിടെ വിദ്വേഷത്തിന്റെയോ കുറ്റപ്പെടുത്തലിന്റെയോ വിത്തുകൾ മുളയ്ക്കാൻ നാം അനുവദിക്കരുത്.
മാനസാന്തരപ്പെടുക, അനുഗ്രഹിക്കപ്പെടുക!
