ഷിരൂർ(കർണാടക):കർണാടകയിലെ ഉത്തര കന്നഡ ജില്ലയിലെ ഷിരൂരിൽ ഉണ്ടായ മണ്ണിടിച്ചിലിൽ കാണാതായ അർജുനനായുള്ള തെരച്ചിൽ വീണ്ടും പ്രതിസന്ധിയിൽ. പ്രദേശത്തെ മോശം കാലാവസ്ഥയും ഗംഗാവാലി നദിയിലെ കനത്ത അടിയൊഴുക്കും മൂലം രക്ഷാപ്രവർത്തകർക്ക് തെരച്ചിൽ പൂർണതോതിൽ ഇന്നലെ നടത്താനാകുന്നില്ല. ഇന്നും ഏതാണ്ട് സമാനമായ കാലാവസ്ഥയാണ് ഇന്നും ഉള്ളത്. ഷിരൂർ ഉൾപ്പെടുന്ന ഉത്തര കന്നഡയിൽ അടുത്ത മൂന്ന് ദിവസം ഓറഞ്ച് അലർട്ട് പ്രഖ്യാപിച്ചിരിക്കുകയാണ്.
എന്നാലും സാഹചര്യം അനുകൂലമാകുന്ന മുറയ്ക്ക് തിരച്ചിൽ തുടരുമെന്നാണ് വിവരം.
എന്നാൽ കാലാവസ്ഥ അനുകൂലമാകും വരെ കാത്തിരിക്കണമെന്ന് ഉത്തര കന്നഡ ജില്ലാ കലക്ടർ ലക്ഷ്മി പ്രിയ പറഞ്ഞു. നാവികർക്ക് സുരക്ഷിതമായി നദിയിൽ ഇറങ്ങാനുള്ള സാഹചര്യം ഉണ്ടാകണം. ഒഴുക്ക് രണ്ട് നോട്ടിൽ കൂടുതലാണെങ്കിൽ ഡൈവർമാർക്ക് ഇറങ്ങാനാകില്ല. ആറ് നോട്ടിലാണ് ഇപ്പോൾ ഒഴുക്ക്. നിലവിൽ കാത്തിരിക്കുക അല്ലാതെ മറ്റ് മാർഗങ്ങളൊന്നുമില്ലെന്നും കാലാവസ്ഥ അനുകൂലമാകാതെ ഒന്നും ചെയ്യാനാകില്ലെന്നും കലക്ടർ വ്യക്തമാക്കി.
അർജുന് വേണ്ടി നേവിയുടെ സ്‌കൂബ സംഘം ഡീപ് ഡൈവിങ് നടത്തുമെന്നാണ് അറിയിച്ചിരുന്നത്. അർജുന്റെ ലോറി കണ്ടെത്തിയത് റോഡിൽ നിന്ന് 60 മീറ്റർ ദൂരെ പുഴയിലാണ്. ഇവിടെ ഇന്നലെ രാത്രി ഡ്രോൺ പരിശോധന നടത്തുമെന്ന് അറിയിച്ചിരുന്നെങ്കിലും കനത്ത മഴ തിരിച്ചടിയായി. ലോറിയുടെ ഉളളിൽ മനുഷ്യസാന്നിദ്ധ്യം സ്ഥിരീകരിക്കാൻ കഴിയാത്ത സാഹചര്യത്തിലാണ് രാത്രിയിലെ പരിശോധന നിശ്ചയിച്ചത്. തണുത്ത കാലാവസ്ഥയിൽ ഡ്രോൺ പരിശോധന നടത്തിയാൽ മനുഷ്യസാന്നിദ്ധ്യം തിരിച്ചറിയാമെന്ന കണക്കുകൂട്ടലിൽ ആയിരുന്നു ഇത്.
അതേസമയം മോർച്ചറിയിലുള്ള ശരീര ഭാഗം ടാങ്കർ ലോറി ഡ്രൈവർ ശരവണൻ്റേതാണെന്ന് തിരിച്ചറിഞ്ഞു. കൂടുതൽ സ്ഥിരീകരണത്തിനായി നാളെ ഡിഎൻഎ പരിശോധന നടത്തും.
ലോറിയിൽ നിന്നും തടികൾ വിട്ടുപോയിട്ടുണ്ട്. കുറച്ച് തടികൾ നദിക്കരയിൽ നിന്ന് കണ്ടെത്തിയിട്ടുണ്ട്. തടികള്‍ ഒഴുകിപ്പോയശേഷമാകും ലോറി മുങ്ങിയതെന്നാണ് പ്രാഥമിക വിവരം. എന്നാൽ അര്‍ജുന്‍ ലോറിക്ക് അകത്താണോ പുറത്താണോ എന്ന് ഇനിയും സ്ഥിരീകരിക്കാനായിട്ടില്ല. അര്‍ജുന്‍ ഉള്‍പ്പടെ മൂന്ന് പേരെയാണ് ഇനി കണ്ടെത്താനുള്ളതെന്നും ദൗത്യസംഘം അറിയിച്ചു.
ഗംഗാവലി പുഴയിലുള്ളത് അർജുന്റെ ട്രക്ക് തന്നെയെന്ന് ഐബോഡ് പരിശോധനയിലും സ്ഥിരീകരിച്ചിരുന്നു. സേനകൾ സിഗ്നൽ കണ്ടെത്തിയ സ്ഥലത്ത് നിന്നും തന്നെയാണ് ഐബോഡ് സിഗ്നലും ലഭിച്ചിരിക്കുന്നത്. ഇതിനിടെ പുഴയിൽ നാലിടത്ത് ലോഹഭാഗങ്ങൾ കണ്ടെത്തിയെന്ന് മേജർ ജനറൽ ഇന്ദ്രബാലൻ വാർത്താ സമ്മേളനത്തിൽ വ്യക്തമാക്കി. ലോറി, ക്യാബിൻ, ടവർ, ഡിവൈഡിംഗ് റെയിൽ എന്നിവയുടെ പോയിന്റ് കണ്ടെത്തിയിട്ടുണ്ട്. നദിയിലെ ഒഴുക്ക് രണ്ട് നോട്ടിൽ കൂടുതലെങ്കിൽ ഡൈവർമാർക്ക് ഇറങ്ങാൻ കഴിയില്ല. എസ്പി, എംഎൽഎമാർ, റിട്ടയേർഡ് മേജർ ജനറൽ ഇന്ദ്രബാലൻ, ജില്ലാ കലക്ടർ അടക്കമുള്ളവർ മാധ്യമങ്ങളെ കണ്ടപ്പോഴാണ് ഇക്കാര്യം വ്യക്തമാക്കിയത്.
ഗംഗാ വലിയിൽ കനത്ത അടിയൊഴുക്കിനെ തുടർന്ന് പലവട്ടം താത്ക്കാലികമായി പരിശോധനകൾ നിർത്തിവെച്ചിരുന്നു. നദിയിലെ ഒഴുക്ക് ഉൾപ്പെടെ പരിശോധിച്ച ശേഷമാണ് പിന്നീട് നടപടികൾ പുനരാരംഭിച്ചത്. നദിയുടെ മുകൾഭാഗത്ത് ഡ്രോണിലെ പ്രത്യേക സംവിധാനം ക്രമീകരിച്ചുകൊണ്ടൊണ് ഒഴുക്ക് പരിശോധിച്ചത്.
=======
