എബി ജോയ്, പുൽപ്പള്ളി
ജപ്പാനിലെ സ്കൂളുകൾ കേവലം അറിവ് പകർന്നു നൽകുന്ന ഇടങ്ങളല്ല, മറിച്ച് സ്വഭാവരൂപീകരണം നടത്തുന്ന കളരികളാണ്.
പത്തു വയസ്സുവരെയുള്ള കുട്ടികൾക്ക് ജപ്പാനിൽ വലിയ പരീക്ഷകളില്ല. അറിവിനേക്കാൾ ഉപരിയായി സ്വഭാവരൂപീകരണം, മൃഗങ്ങളോടുള്ള സ്നേഹം, പ്രകൃതി സംരക്ഷണം, ഔചിത്യം (Manners) എന്നിവയ്ക്കാണ് ഈ കാലയളവിൽ പ്രാധാന്യം നൽകുന്നത്.
ജപ്പാനിലെ സ്കൂളുകളിൽ ശുചീകരണ തൊഴിലാളികളില്ല. കുട്ടികൾ തന്നെ ക്ലാസ് മുറികളും ടോയ്ലറ്റുകളും വൃത്തിയാക്കുന്നു. ഇത് അവരിൽ തൊഴിലിന്റെ മഹത്വവും (Dignity of Labour), ഒരു പൊതുവിടം എങ്ങനെ വൃത്തിയായി സൂക്ഷിക്കണം എന്ന ബോധവും വളർത്തുന്നു.
കുട്ടികൾ അധ്യാപകർക്കൊപ്പം ഒരേ ഭക്ഷണം കഴിക്കുന്നു. ഭക്ഷണം വിളമ്പുന്നതും പാത്രങ്ങൾ കഴുകി വെക്കുന്നതും കുട്ടികൾ തന്നെയാണ്. ഇത് സമത്വഭാവം വളർത്താൻ സഹായിക്കുന്നു.
ജപ്പാൻ സമൂഹത്തിൽ ബഹുമാനം എന്നത് ഒരു ആചാരം മാത്രമല്ല, അത് അവരുടെ ജീവിതത്തിന്റെ ഭാഗമാണ്. ഇതിനെ ‘റെയ്’ (Rei) എന്ന് അവർ വിളിക്കുന്നു.
ജപ്പാൻകാർ ഒരാളെ കാണുമ്പോൾ വണങ്ങുന്നത് (Ojigi) കേവലം ഒരു അഭിവാദ്യമല്ല. മുൻപിൽ നിൽക്കുന്ന വ്യക്തിയോടുള്ള ബഹുമാനവും വിനയവും പ്രകടിപ്പിക്കലാണത്. എത്രത്തോളം ആഴത്തിൽ വണങ്ങുന്നു എന്നത് ആ വ്യക്തിയോടുള്ള ബഹുമാനത്തിന്റെ അളവുകോലാണ്.
മുതിർന്നവരോടും അപരിചിതരോടും സംസാരിക്കുമ്പോൾ ജപ്പാൻ ഭാഷയിൽ പ്രത്യേക പദപ്രയോഗങ്ങൾ (Honorifics) ഉപയോഗിക്കുന്നു. ഇത് സമൂഹത്തിൽ ഒരു ആരോഗ്യകരമായ അകലവും അതേസമയം വലിയ തോതിലുള്ള ബഹുമാനവും നിലനിർത്തുന്നു.
മറ്റൊരാൾ സംസാരിക്കുമ്പോൾ ഇടയിൽ കയറി സംസാരിക്കാതെ പൂർണ്ണമായും ശ്രദ്ധിച്ചു കേൾക്കുക എന്നത് അവരുടെ വലിയ ഗുണമാണ്. ഇത് ആശയവിനിമയത്തിലെ തടസ്സങ്ങൾ ഒഴിവാക്കുന്നു.
നമ്മൾക്ക് മാതൃകയാക്കാവുന്ന കാര്യങ്ങൾ –
നമ്മുടെ വിദ്യാഭ്യാസത്തിലും പെരുമാറ്റത്തിലും വരുത്തേണ്ട പ്രധാന മാറ്റങ്ങൾ ഇവയാണ്:
സ്കൂളുകളിൽ ശുചിത്വ പരിശീലനം: സ്കൂൾ പരിസരം കുട്ടികൾ തന്നെ വൃത്തിയാക്കുന്ന രീതി കേരളത്തിൽ നടപ്പിലാക്കിയാൽ, പൊതുസ്ഥലത്ത് മാലിന്യം വലിച്ചെറിയുന്ന മലയാളി ശീലം ഒരു തലമുറകൊണ്ട് മാറിക്കിട്ടും.
മുതിർന്നവരോടുള്ള സമീപനം: ജപ്പാനിൽ പ്രായമായവർക്ക് സമൂഹത്തിൽ വലിയ സ്ഥാനമുണ്ട്. അവരുടെ അനുഭവങ്ങളെ പുതിയ തലമുറ ഉപയോഗപ്പെടുത്തുന്നു. കേരളത്തിലും മുതിർന്ന പൗരന്മാരുടെ അറിവുകൾ വികസന പ്രവർത്തനങ്ങളിൽ ഉപയോഗിക്കാവുന്നതാണ്.
വ്യക്തിപരമായ വിനയം: “ഞാൻ” എന്ന ഭാവത്തിന് പകരം “ഞങ്ങൾ” എന്ന ഭാവം വളർത്തിയെടുക്കണം. ജപ്പാനിലെ ‘ഇക്കിഗായ്’ (Ikigai) എന്ന തത്വം പോലെ, എല്ലാവർക്കും ഉപകാരപ്രദമായ ഒരു ലക്ഷ്യത്തിനായി ജീവിക്കാൻ നമ്മൾ ശീലിക്കണം.
