ടെല്‍ അവീവ്: ഗാസയിലെ സമാധാനത്തിന് ശേഷം ഭരണം ഹമാസ് വീണ്ടും കൈവശപ്പെടുത്തുകയാണെങ്കില്‍, പോരാട്ടത്തിലേക്ക് തിരിച്ചുപോകാൻ ഇസ്രായേല്‍ സൈന്യം (ഐഡിഎഫ്) സമ്ബൂർണ്ണമായി തയ്യാറാണെന്ന് ഐഡിഎഫ് വക്താവ് എഫി ഡെഫ്രിൻ വ്യക്തമാക്കി.
ഇന്നത്തെ ഹമാസ് “രണ്ട് വർഷം മുൻപുള്ള ഹമാസ് അല്ലെ”ന്ന് ഡെഫ്രിൻ അഭിപ്രായപ്പെട്ടു. “ഞങ്ങള്‍ പോരാടിയ എല്ലായിടത്തും ഹമാസ് പരാജയപ്പെട്ടിട്ടുണ്ട്. സൈനികപരമായും ഭരണപരമായും അത് സംഭവിച്ചു,” അദ്ദേഹം കൂട്ടിച്ചേർത്തു.
പലസ്തീൻ അതോറിറ്റി അവരുടെ “പരിഷ്കരണ പരിപാടി” പൂർത്തിയാക്കി, “ഗാസയുടെ നിയന്ത്രണം സുരക്ഷിതമായും ഫലപ്രദമായും തിരിച്ചുപിടിക്കാൻ” കഴിയുന്നത് വരെ ഒരു ഇടക്കാല സർക്കാർ ഗാസ ഭരിക്കണം എന്നാണ് ഇസ്രായേലും ഹമാസും തമ്മില്‍ ധാരണയായ 20 ഇന വെടിനിർത്തല്‍ പദ്ധതിയില്‍ വ്യക്തമാക്കിയിട്ടുള്ളത്. ഈ നിർദ്ദേശങ്ങള്‍ നിലനില്‍ക്കെ, ഹമാസ് ഏതെങ്കിലും വിധത്തില്‍ ഗാസയുടെ നിയന്ത്രണം നേടിയെടുക്കാൻ ശ്രമിച്ചാല്‍ ഇസ്രായേല്‍ സൈന്യത്തിന് നടപടിയെടുക്കേണ്ടി വരുമെന്ന് ഡെഫ്രിൻ മുന്നറിയിപ്പ് നല്‍കി.
“യുദ്ധത്തിന് ശേഷമുള്ള അടുത്ത ദിവസം ഗാസ മുനമ്ബില്‍ ഹമാസിന്റെ നിയന്ത്രണം വെച്ച്‌ ഞങ്ങള്‍ക്ക് ജീവിക്കാൻ കഴിയില്ല,” അദ്ദേഹം പറഞ്ഞു. “ഇത് ചർച്ചകളിലൂടെ നേടിയെടുക്കാൻ കഴിഞ്ഞാല്‍ മതിയാകും. അല്ലെങ്കില്‍, ആവശ്യമുള്ളപ്പോഴെല്ലാം തിരികെ പോരാടാൻ ഞങ്ങള്‍ക്ക് അറിയാം.” “പോരാട്ടത്തിലേക്ക് മടങ്ങാനും, ഹമാസിനെതിരെ യുദ്ധം ചെയ്യാനും, അവരുടെ ഭരണപരമായ ശേഷി ഇല്ലാതാക്കാനും ഐഡിഎഫ് സജ്ജമാണ്. അവർ ഗാസ മുനമ്ബിന്റെ നിയന്ത്രണം തിരികെ എടുക്കാൻ അനുവദിക്കില്ല,” അദ്ദേഹം വ്യക്തമാക്കി.
