തിരുവനന്തപുരം: വിഴിഞ്ഞത്ത് നിന്നും കഴിഞ്ഞ ദിവസം രാവിലെ കാണാതായ 13കാരി വിമാനം കയറി ദില്ലിയിലെത്തി. ദില്ലിയില് തടഞ്ഞുവച്ച പെണ്കുട്ടിയെ തിരികെ എത്തിക്കാൻ വിഴിഞ്ഞം പൊലീസ് വിമാനം കയറി.
വിഴിഞ്ഞത്ത് താമസിക്കുന്ന പശ്ചിമ ബംഗാള് സ്വദേശികളുടെ മകളാണ് ഒറ്റയ്ക്ക് വിമാനം കയറി ദില്ലിയില് എത്തിയത്.
രാവിലെ 7 മുതല് പെണ്കുട്ടിയെ കാണാനില്ലെന്ന് കാണിച്ച് ബന്ധുകള് വിഴിഞ്ഞം പൊലീസ് സ്റ്റേഷനില് പരാതി നല്കിയിരുന്നു. അന്വേഷണം നടക്കുന്നതിനിടയില് കുട്ടി കയറിയ ഓട്ടോയുടെ ഡ്രൈവറെ കണ്ടെത്തി. ഇയാള് പറഞ്ഞതനുസരിച്ച് തിരുവനന്തപുരം വിമാനത്താവളവുമായി ബന്ധപ്പെട്ടപ്പോള് കുട്ടി ദില്ലിയിലേക്ക് വിമാനം കയറിയതായി പൊലീസിന് വിവരം ലഭിച്ചു.
ഇതിനെ തുടർന്ന് ദില്ലി വിമാനത്താവള സുരക്ഷാ സേനയ്ക്ക് സിറ്റി പൊലീസ് കമ്മിഷണർ വിവരം കൈമാറി. ഉച്ചയ്ക്ക് ഒരു മണിയോടെ വിമാനം ഇറങ്ങിയ ഉടൻ കുട്ടിയെ ദില്ലിയില് തടഞ്ഞു വയ്ക്കുകയുമായിരുന്നു. കുട്ടിയെ പൊലീസ് ഇന്ന് തിരികെ വിഴിഞ്ഞത്ത് എത്തിക്കും. കുട്ടിയ്ക്ക് വിമാന ടിക്കറ്റ് എങ്ങനെ കിട്ടി എന്നത് ഉള്പ്പെടെ അന്വേഷിക്കുമെന്ന് വിഴിഞ്ഞം പൊലീസ് പറഞ്ഞു.
