-രാജൂ തരകൻ
ഡാളസ്, ടെക്സാസ്: ഡാളസ് പട്ടണത്തിലെ മലയാളി പെന്തക്കോസ്തൽ സഭകളുടെ ഐക്യവേദിയായ ഡാളസ് സിറ്റി-വൈഡ് ഫെലോഷിപ്പിന്റെ പ്രവർത്തനോൽഘാടനം 2026 മാർച്ച് 14 ശനിയാഴ്ച രാവിലെ 10:00 മുതൽ 12:30 വരെ, ശാരോൻ ഫൽലോഷിപ്പ് സഭയിൽ (940 Barnes Bridge Rd, Mesquite, TX 75149) വച്ച് നടക്കുന്നതാണ്.
“ദൈവരാജ്യത്തിനായി ഐക്യപ്പെടുക” എന്നതാണ് സെമിനാറിന്റെ മുഖ്യ വിഷയം.ഈ പ്രത്യേക യോഗത്തിൽ പാസ്റ്റർ തോമസ് മുല്ലയ്ക്കൽ ഉദ്ഘാടന പ്രസംഗം നടത്തുന്നതാണ്. തുടർന്ന് പാസ്റ്റർ സ്റ്റീഫൻ വർഗീസ് “ക്രിസ്തുവിൽ നാം ആരാണ്” എന്ന വിഷയത്തിലും ഡോ. തോമസ് ഇടിക്കുള “നമുക്ക് ഒരുമിച്ച് ചെയ്യാനാകുന്നത് എന്ത്” എന്ന വിഷയത്തിലും പ്രഭാഷണം നടത്തുകയും ചെയ്യും. അതിന് ശേഷം ഒരു ഇന്ററാക്ടീവ് പാനൽ ചർച്ചയും ചോദ്യോത്തര സെഷനും ഉണ്ടായിരിക്കുന്നതാണ്.
ഡാളസ് സിറ്റി-വൈഡ് ഫെല്ലോഷിപ്പ്(DCF) ന്റെ ഉദ്ഘാടന സെമിനാറിൽ എല്ലാ പാസ്റ്റർമാർക്കും സഭാനേതാക്കൾക്കും വിശ്വാസി സമൂഹത്തിനും പങ്കെടുക്കാവുന്നതാണ്. DCF-ന്റെ ഈ വർഷത്തെ പ്രവർത്തനങ്ങളുടെ ആരംഭം അടയാളപ്പെടുത്തുന്ന ഈ യോഗം, ദൈവനാമ മഹത്വത്തിനായി വിശ്വാസ സമൂഹങ്ങൾക്കിടയിൽ ഐക്യം വളർത്തുന്നതിനായി സംഘടിപ്പിക്കപ്പെടുന്നു.
എസ് പി ജെയിംസ് (സെക്രട്ടറി), തോമസ് ചെല്ലേത്ത് (ട്രെഷററാർ), ജോസ് പ്രകാശ് കരിമ്പിനേത്ത് (മ്യൂസിക് കോ-ഓർഡിനേറ്റർ) അന്നമ്മ വില്യംസ് (സിസ്റ്റേഴ്സ് കോ-ഓർഡിനേറ്റർ), രാജു തരകൻ (മീഡിയ കോ-ഓർഡിനേറ്റർ) കൂടാതെ പാസ്റ്റർ മാത്യു ശാമുവേൽ, പാസ്റ്റർ എബ്രഹാം തോമസ്, ഷാജി മണിയാറ്റ് , വർഗ്ഗീസ് വർഗ്ഗീസ് എന്നിവർ യോഗത്തിന് നേതൃത്വം നൽകുന്നു. എല്ലാ പ്രായത്തിലുമുള്ള വ്യക്തികളെയും, വിവിധ സഭകളെയും ഒരുമിച്ചുനിർത്തുക എന്ന ലക്ഷ്യത്തോടെ രൂപീകരിച്ച ഡാളസ് സിറ്റി-വൈഡ് ഫെല്ലോഷിപ്പ് നാല്പതാമത് വാർഷികം പ്രമാണിച്ച് വിവിധ പ്രോഗ്രാമുകൾക്ക് രൂപം കൊടുത്തുകൊണ്ടിരിക്കുന്നു.
എല്ലാ ചൊവ്വാഴ്ചയും വൈകുന്നേരം 7:30-ന് നടക്കുന്ന പ്രെയർലൈൻ ഡാളസിലെ വിവിധ സഭകളുടെയും ദൈവമക്കളുടെയും നേതൃത്വത്തിൽ ഓരോ ആഴ്ചയും വിജയകരമായി നടന്നുവരുന്നു. (805)706-5223 എന്ന നമ്പറിൽ വിളിച്ചാൽ പ്രെയർലൈനിൽ ജോയിൻ ചെയ്യാവുന്നതാണ്. കൂടാതെ dallascitywide.org എന്ന പേരിലുള്ള വെബ്സൈറ്റിലൂടെ വിവിധ പ്രോഗ്രാമുകളെക്കുറിച്ചുള്ള വിശദവിവരങ്ങൾ ഉൾപ്പെടുത്തിയിട്ടുണ്ട്. അറുപതിലധികം സഭകളും ഏകദേശം ഇരുന്നൂറോളം പാസ്റ്റർമാരും ആയിരക്കണക്കിന് വിശ്വാസികളും ഉൾപ്പെടുന്ന ഡാളസിലെ മലയാളി പെന്തെക്കോസ്ത് സമൂഹം, അമേരിക്കയിൽ മലയാളി പെന്തെക്കോസ്ത് വിശ്വാസികൾ ഏറ്റവും കൂടുതലായി താമസിക്കുന്ന നഗരങ്ങളിൽ ഒന്നായി അറിയപ്പെടുന്നു.
