ഫ്ലോറിഡയുടെ കിഴക്കൻ തീരത്തുള്ള ‘ട്രെഷർ കോസ്റ്റ്’ എന്നറിയപ്പെടുന്ന കടല് ഭാഗത്ത്, ഏകദേശം 300 വർഷം മുമ്ബ് തകർന്ന ഒരു സ്പാനിഷ് കപ്പലില് നിന്ന് വൻ നിധിശേഖരം കണ്ടെത്തി.
1715-ല് മുങ്ങിപ്പോയ കപ്പലില് നിന്നാണ് ഏകദേശം 10 ലക്ഷം ഡോളർ (ഏകദേശം 8.87 കോടി ഇന്ത്യൻ രൂപ) വിലമതിക്കുന്ന അഞ്ച് സ്വർണ്ണ നാണയങ്ങളും 1,000-ത്തിലധികം വെള്ളി നാണയങ്ങളും ഉള്പ്പെടെയുള്ള അമൂല്യ വസ്തുക്കള് കണ്ടെടുത്തത്.
നിധി കണ്ടെടുത്ത ക്വീൻസ് ജുവല്സ് എല്എല്സി എന്ന സ്ഥാപനമാണ് വിവരങ്ങള് പുറത്തുവിട്ടത്. ക്യാപ്റ്റൻ ലെവിൻ ഷേവേഴ്സിന്റെയും എം/വി ജസ്റ്റ് റൈറ്റ് എന്ന കപ്പലിലെ ജീവനക്കാരുടെയും നേതൃത്വത്തിലാണ് ഈ അത്യപൂർവമായ നിധിശേഖരം പുറത്തെടുത്തത്.
‘എസ്കുഡോസ്’ എന്ന് അറിയപ്പെടുന്ന, ഏകദേശം 1 മില്യണ് ഡോളർ വിലമതിക്കുന്ന അഞ്ച് സ്വർണ്ണ നാണയങ്ങള്. ‘റിയല്സ്’ എന്നറിയപ്പെടുന്ന 1,000-ത്തിലധികം വെള്ളി നാണയങ്ങള്. ഇവ കൂടാതെ, മറ്റ് ചില അപൂർവ സ്വർണ്ണ പുരാവസ്തുക്കളും കണ്ടെത്തിയിട്ടുണ്ട്.
നിധി വഹിച്ചിരുന്ന കപ്പല് 1715 ജൂലൈ 31-ന് ഉണ്ടായ ദുരന്തത്തിലാണ് തകർന്നത്. ഈ സ്പാനിഷ് കപ്പല് ‘ന്യൂ വേള്ഡ് റിസീവുകള്’ എന്നറിയപ്പെടുന്ന നിധിശേഖരം സ്പെയിനിലേക്ക് തിരികെ കൊണ്ടുപോകുന്നതിനിടെയാണ് അപകടത്തില്പ്പെട്ടത്.
ഈ കണ്ടെത്തല് കേവലം നിധിശേഖരം മാത്രമല്ല, അന്നത്തെ സ്പാനിഷ് സാമ്രാജ്യത്തിന്റെ സുവർണ്ണ കാലഘട്ടത്തില് ജീവിച്ചവരുടെയും സഞ്ചരിച്ചവരുടെയും ചരിത്രം കൂടിയാണ് പറയുന്നതെന്ന് ഓപ്പറേഷൻസ് ഡയറക്ടർ സാല് ഗുട്ടുസോ അഭിപ്രായപ്പെട്ടു. കണ്ടെടുത്ത ഓരോ നാണയവും ആ ആളുകളുമായുള്ള ഒരു ആത്മബന്ധമാണ് നല്കുന്നതെന്നും അദ്ദേഹം കൂട്ടിച്ചേർത്തു.
‘പീസസ് ഓഫ് എയ്റ്റ്’ എന്നറിയപ്പെടുന്ന ഈ വെള്ളി നാണയങ്ങള് മെക്സിക്കോ, പെറു, ബൊളീവിയ എന്നിവിടങ്ങളിലെ സ്പാനിഷ് കോളനികളില് നിർമ്മിച്ചവയാണ്.
ഈ അമൂല്യ നാണയങ്ങള് പൊതുജനങ്ങള്ക്ക് കാണുന്നതിനായി പ്രദർശിപ്പിക്കുമെന്ന് ക്വീൻസ് ജുവല്സ് എല്എല്സി അറിയിച്ചു. പാം ബീച്ചില് നിന്ന് ഏകദേശം 95 മൈല് വടക്കായി സ്ഥിതി ചെയ്യുന്ന സെബാസ്റ്റ്യൻ എന്ന തീരദേശ നഗരത്തിന് സമീപമാണ് ക്വീൻസ് ജുവല്സിന്റെ രക്ഷാപ്രവർത്തനം നടന്നത്. നിധി വേട്ടക്കാർ, പുരാവസ്തു ഗവേഷകർ, മ്യൂസിയങ്ങള് എന്നിവരുമായി സഹകരിച്ച് പ്രവർത്തിക്കുന്ന സ്ഥാപനമാണിത്.
